Theresa跟金牌大風的恩怨纏繞不休，隨着加盟星皓，與舊公司的轇轕暫告一段落，Theresa以畫畫來作譬如：「感覺好似畫咗幅畫，但畫錯咗好唔滿意，惟有撕爛幅畫掟走，重新再畫過，希望下次畫得準確啲。」對過去她並沒有後悔，認為是人生一個歷程：「對我來講係催人成長，都係一件好事。」

前路滿希望

臉上總掛住笑意的Theresa，整個人變得輕鬆、開朗，她說：「以前個人好緊張，好冇安全感，工作環境開唔開心對藝人都有影響，喺一間公司有人支持你係好緊要，會令你工作時都有信心啲。」她以「新人」來形容自己，雖然要重新出發，但至少看得見前面的路，她說：「依然有希望！」

Theresa承認過去有多方面做得不好，特別是她過分堅持及執着的性格，是她的致命傷，她說：「可能我係處女座，乜都要做到最好，所以畀到好大壓力自己，令自己同身邊人都好辛苦。」隨着時間成長，她明白以前做事方式未必最好，適當的轉變是需要，她說：「我唔係唔肯妥協，係需要有人話我知，如果有道理又幫到件事嘅我可以接受。」

意志療抑鬱

未過檔新公司前的Theresa，一度感到無助，似迷途羔羊般，她說：「嗰時壓力去到頂點，（有冇懷疑自己有抑鬱？）係有病，其實呢行係好平常，但我唔想食藥，想靠自己諗通，如今總算捱過咗。」她知自己確實有問題，外界將所有問題演變成一種怪責，加罪於她身上，她說：「工作上有乜問題，最傷心係自己，造成咁多誤解，可能係自己唔識修飾，原來說話都係一種藝術！」

好友何詩 安慰支持

Theresa在圈中好友不多，包括何韻詩、小肥、陳嘉上，她說：「做朋友要人夾人緣，睇你鍾意邊類型朋友，我鍾意一啲真嘅朋友。」在她徬徨無助時，阿詩給她支持、安慰，也給她不少意見，而小肥就跟她同期出道，大家感情像兄妹般，間中會傾談心事，至於與前輩陳嘉上雖然見面不多，但對方同樣好撐她，她說：「佢教我好多，令我獲益良多。」

愛好繪本 熱捧幾米

愛好繪本的Theresa，得知繪本畫家幾米的書中人物在鬧巿出現，她興奮不已，第一時間跟寂寞大灰兔拍照留念，她用「童話夜」來形容，她笑說：「我好鍾意幾米，有齊晒佢嘅作品，唔理得大街大巷好多人喺度，我都同佢啲書中人物拍照留念。」她更期望將來有機會成為幾米畫下的電影女主角。

Hair：Vince Pang(Assisted by Linfa Li)@IL Colpo

文：音樂組　攝：馬永堅