陳豪昨日以代言人身份出席活動，在台上自爆會送手袋給女友的他，到了台下竟反口表示只送過手袋給女性朋友。問到有否送過手袋給緋聞女友廖碧兒時，他即扯開話題謂：「我試過送咖啡。（親自煮？）都試過！（喺現場揀個手袋送畀對方。）一陣睇吓，但唔知佢鍾意大定細。」雖然陳豪回答記者提問小心翼翼，但慘遭身旁的陳法拉踢爆，指他曾買女裝衫。法拉說：「喺新西蘭陳豪有陪我揀鞋。（佢有冇買女仔衫？）好似有，我見到佢買嗰啲唔係男裝衫。死咯！我係咪爆咗人嘢？」