佘詩曼與楊怡均是今屆視后大熱門，未待頒獎禮前夕已暗地惡鬥。因新劇帶挈人氣急升的兩女，出席活動時均表示工作量倍增，阿佘揚言有七位數字進帳，楊怡則大口氣要買多層樓。這場由台上鬥到台下的「爭奪戰」果然精彩！
由戲內鬥到戲外的阿佘與楊怡，前晚及昨日分別出席腕錶活動及新店開幕，二人均異口同聲表示工作量倍增，難怪兩女出席活動時容光煥發，經常笑到見牙唔見眼。
阿佘前晚穿上tube dress銀色長裙，出席積家腕錶「Master Ultra thin超薄珐瑯彩繪清花系列」腕錶記者會。雖然阿佘正面無甚睇頭，但其大露背卻春光無限。全身行頭價值超過四百萬的阿佘，手上更戴着由大會送贈的限量版腕錶，價值四十多萬。
買玉器贈母親
問到阿佘是否手錶之外還另有酬勞時，她即開心笑謂：「係囉！」阿佘坦言自《宮心計》播出後，工作一浪接一浪，尤其是賺外快活動。問到她進帳有否七位數時，她即興奮地表示：「差唔多！」豬籠入水的阿佘又透露，平時有買玉器送給母親及婆婆，果然富貴。
貫徹攞女精神
另外，昨日楊怡、陳豪、陳法拉、龔嘉欣和楊洛婷等出席活動。問楊怡是否賺到盆滿缽滿？她即笑到見牙唔見眼表示：「都係託姚金鈴嘅福！真係多咗好多job，但因為依家拍緊劇，所以要同監製度期，但呢個聖誕已接咗job。」賺到笑的楊怡笑謂要攞盡出席活動的所有贊助：「梗係攞！依家攞得就攞！我要貫徹『攞女』嘅風氣同姚金鈴嘅性格。（有冇上限？）唔理啦！」
愈說愈興奮的楊怡，問到會否買樓時，她竟揚言要買多層，即遭記者取笑大口氣及貪心，楊怡聞言即搞爛gag解圍：「人係向上望嘅！有機會買就梗係想買多層啦！但可能到年尾我淨係買到間屋放喺屋企畀我隻狗呢！」
文：影視組