黎耀祥在《巾幗梟雄》中將柴九一角演得有血有淚，臨終一幕令不少觀眾哭斷腸！雖然結局哀怨，但祥仔演技卻備受激賞，有望「升呢」做視帝！他笑說：「其實我攞唔攞獎都冇所謂，可能我已經係好多人心目中嘅視帝。」眾多對手當中，祥仔直言視陳豪為最大對手，不過仍會把自己睇高一線，他解釋：「之前叫陳豪讓獎只係講笑，因為我同佢好熟，如果唔係都唔夠膽咁講啦。我覺得陳豪演技好特別，我都好欣賞佢，不過《宮心計》始終係女人戲，男人冇咁大發揮，所以我覺得今年自己機會大過佢。」

互寸增情趣

祥仔演技可謂不容置疑，但竟然有一個人經常出言批評祥仔演技？祥仔自爆內幕說：「嗰個咪我老婆，平時就算我演技有幾好，但佢都會捉到我錯處，套套都彈……今次最幸運，佢讚『柴九』演得無懈可擊。」祥仔表示與太太方向一致，無論遇到甚麼困難都會一起解決，他說：「我哋平時會鍾意互寸，可能呢啲就係生活情趣。」

簽約冇着數

至於對兒子黎正橋的管教，祥仔亦抱開放態度，他解釋：「我唔會逼佢入娛圈，只要佢開心就得。個仔成日同老師、同學講，黎耀祥係佢老竇，我都覺得好自豪。」

此外，每年台慶都會傳藝人簽約換獎，但祥仔堅拒「就範」說：「習慣自己處理錢嘅問題，因為海外工作唔使交稅，如果簽咗無綫，變相少咗三分之一收入，其實依家無綫都有幫我接海外工作，我都有分番錢畀佢哋，所以簽唔簽冇咩太大改變。」

文：專案組

場地：Spasso 髮型：Ivan Lee@ headquarters