婷婷涉足影壇，除獲父母謝賢、狄波拉現身支持外，好友鄭欣宜及多位圈中猛人，如陳百祥、黃杏秀、霍汶希、吳雨、查小欣、張耀榮等亦有站台力撐。婷婷解釋，因哥哥謝霆鋒及男友安志杰均要開工，故被迫缺席：「哥哥喺幕後做咗好多嘢幫我，佢以為我唔知，佢好愛我，其實我知囉！佢雖然唔多嘢講，但佢都好鼓勵我。男友有畀message我，叫我做番自己，自然啲、自信啲，有機會都想同佢合作拍戲，因為佢係一個有經驗、有talent嘅演員。（阿嫂張栢芝唔方便撐場？）係，但佢有搭住我大髀，教我乜嘢應做、乜嘢唔應做，拍戲同呢行嘅經驗都有教我，我有睇佢演嘅戲學嘢。（你以前話過唔入行！）都有少少上天注定，哥哥都驚我捱，但佢都捱啦！錫我嘅人當然唔贊成我入行，怕我辛苦。」

婷婷獲好友欣宜上台送花。	英皇高層吳雨和霍汶希亦有畀面到場。	謝賢與狄波拉力撐愛女，但拒代答栢芝是否不再拍戲。

性感底線拒全裸

婷婷又稱性感算是型格一種，但會有自己底線：「每個女人都應該有guideline，我會睇角色、劇本，但一定唔會唔着衫拍戲，全裸可以搵替身啫！（簽咗幾年約？）三年，年期啱啱好，十年會好大壓力，大家都唔知道將來會點。（有人搵你簽十年？）唔係，十年係比較傳統嘅年期。我會model、拍戲雙線發展，唱歌、跳舞唔係我本行，但慈善性質都可以嘅！」

影王朝行政總裁王晶則力撐婷婷可繼楊紫瓊後成為新一代型女，他說：「呢行識做戲嘅好多，好似周迅、李冰冰咁，靚嘅有大班g模，但好多年冇型女，婷婷有潛質。同佢係友誼式合作，唔會綑死佢，尊重佢意願，model工作都係簽埋我哋，（安排佢同安志杰情侶檔？）向來唔贊成情侶檔，觀眾唔鍾意，但安志杰係好演員，有適合嘅都會用佢。」

霆鋒剃頭手勢佳

此外，霆鋒近日積極為英皇電影《綫人》開工，戲中要以光頭look上陣的他，原來是自己為自己剃頭，劇組眾人無不大讚他剃頭手勢一流，霆鋒說：「我唔係第一次剃頭演出，自己幫自己唔使次次麻煩人，稍後拍《新少林寺》都係光頭look㗎！」

霆鋒為自己剃頭，手勢駕輕就熟。

霆鋒由導演林超賢陪同剃頭。

文：影視組　攝：黎志輝