本文重點
張敬軒前晚與一班歌手出席「麥當勞愛心童樂日2009音樂會」，同場還有謝安琪、林海峰及葛民輝等。軒仔甫坐下即自爆家中菲傭失驚無神執包袱「跟佬走」，令他傷心又徬徨，軒仔表示：「我知個菲傭有拍拖，但前幾日見個菲傭兩日冇返屋企瞓，打開佢衣櫃發現冇晒啲衫，跟住即刻走去報警，不過我當正佢係屋企人，所以唔會追究，我仲為呢件事而喊，最心噏係見隻狗去敲佢房門！」軒仔坦言有send電郵追問菲傭為何不辭而別，希望對方給自己一個交代。
搵關智斌做翻譯
記者叫軒仔找擁有菲律賓血統的「斌佬」關智斌取代菲傭，他聞言反應甚大：「哈哈……關佢咩事啫，唔得，太敏感！」不過軒仔其後又表示：「下次如果溝通上有咩問題，可以請佢幫我做翻譯都得喎！」至於同場的林海峰則表示家中「陰氣」多，所以自己沒甚麼地位，對於軒仔菲傭懷疑「跟佬走」，林海峰說：「愛情要嚟都無可抗拒，我都預咗個女將來大個要畀人，我夠攞咗人哋個女啦！」
文：音樂組