伊健、城城主演的寰宇新片《風雲II》宣傳攻勢浪接浪，昨日前者「單飛」為主題K房揭幕，手執兩把道具巨刀造勢，大擺型仔甫士，導演彭順亦出席。由於《風》片口碑不錯，伊健早前不禁先偷睇：「靜雞雞睇咗其中一段，都未試過拍完部戲冇得率先欣賞嘅，我諗最快都要等到月底，同城城去新加坡首映才可先睹為快。」

彭順斟續集

伊健與彭順皆對新片信心十足，彭順更抵死謂經常光顧的茶餐廳老闆也鮮有地問他要贈券，足見「萬眾期待」，而電影公司也開始與他傾談再開續集，最快明年成事。談到《風》片同期上映的勁敵時，彭順笑謂：「我同細佬（彭發）一齊做導演，一人負責拍一part，佢咪我勁敵囉。（票房好乘機公布婚期？就快做老竇？）未咁快住，依家忙住生『風雲B』，十二月十日出世嘞。」伊健同樣推搪婚期：「呢啲嘢我『睇頭』㗎。」

被迫瞓地牢

至於有份客串演出《風》片的霆鋒則大方得多，早前他接受專訪大談「家庭樂」，指由於全家先後染上感冒，故刻下各人分層而睡，他「被迫」睡地牢！談到他借出中環三個舖位作拍新片之用，他坦言日後會留給兒子，又指栢芝已好一段時間沒有拍戲，相信已不能再「走回頭路」，為了讓一家生活得更好，他定會努力為未來打算。至於老婆胎兒性別問題，霆鋒笑說：「依家先得三個月，仲未知，不過佢（指栢芝）想生女喎。」

文：影視組