視帝大熱黎耀祥出席「心晴行動」宣傳活動，備受商場內的市民拍手歡呼，但祥仔借勢玩「高層」，大叫「高層啲人唔拍手我冇獎攞！」祥仔事後坦言三個月前已跟無綫表明立場，不做其「親生仔」，此話大有弦外之音。
昨日的活動上，當祥仔出場時，「心晴」主席林建明情緒高漲，大叫他為視帝，並指鄧萃雯亦是她心目中的「視后」，要是無綫今年不給二人獎項，她要劈TVB。提到情緒問題，祥仔坦言入行廿多年，曾經想退出，後來認清目標，知道拍戲是他生命中重要的事，把握方向便不會迷失，任何時候都要對自己有信心。
爆金句鼓掌
說得興起，祥仔繼「人生有幾多個十年」金句後，即場自度新金句「做事認真，做人求其」而贏得滿場掌聲。記者問現在勢好還有想過要退出？祥仔說：「好少諗啦，（搵多咗錢？）無綫都縮皮啦，（夠膽話無綫縮皮？）我都話做人唔使咁認真，我講笑啫，就算係都可以理解，大勢所趨，市場需要，互相體諒啦，（知無綫早排有人示威？）我少行嗰邊門口，唔知。」
自言有客路
「視帝」似是他的囊中物，外間關注候選人祥仔會否跟無綫簽「包薪」做其「親生仔」，造就攞獎機會？祥仔卻不以為然，並自爆三個月前已拒絕無綫。他說：「我覺得依家簽約唔係成熟時機，有待再合作，其實我興趣不大，話晒我自己有客路，如果簽經理人，個客搵我做嘢會好轉折。（唔簽咪冇獎？）唔覺得會，（唔係親生仔嘛？）親生仔係你哋話，我都係無綫合約藝員，無綫係大機構，每年幾十億生意，點會為賺唔到少少佣而同我計，（仲有信心？）有，《巾幗梟雄》喺今年嘅節目巡禮都仲出緊，代表仲OK啦。」
文：影視組