本文重點
李婉華於上月一日在溫哥華順利誕下男孖胎，餵人奶的婉華每兩小時就要餵孖B，令她乳腺發達，日日谷奶，本已有睇頭的「咪咪」升Cup至G奶，她笑說：「G奶蔡依林都要行埋一邊！」
大女已六歲的婉華今次順利剖腹誕孖B，比預產期早了兩星期，大細孖都很健康，出世時間只差一分鐘，大孖重5.8磅，細孖則重4.13磅，婉華說：「事隔一個月，孖仔已重咗一倍，我忙於湊B餵奶，因為餵人奶唔可以減肥，希望遲啲修身，依家由168磅減了38磅，仲係好肥好醜樣呀！」
大細B立體聲
孖B出世一刻，喊聲震天，婉華笑言當時聞得兩子齊喊，猶如立體聲般，其夫亦在產房伴產及拍片，至今孖B名字未改，只叫大、細B：「孖B出生一刻，我開心到流眼淚，但老公就眼淚在心裏流。（送咩禮物獎勵你？）講咗會送，不過都嫁畀佢啦，老公話都送咗佢畀我啦！」目前家住三千呎獨立屋的婉華，因新生命的來臨再加上工人已逼爆屋，笑言要換大屋才可住得較舒服。
婉華在加拿大中文電台主持節目，因坐月休息五個月，母親昨日赴加陪月，而一班同事及移居當地的黃淑儀都有探望，老友黎瑞恩更空運送上一箱育嬰書和BB衫作禮物。
文：影視組