08年頭，留學澳洲的豆沙包返港，被現時的經理人發掘加入娛樂圈，第一份工作便化身《美女廚房》的「美味天使」！料不到竟會惹上麻煩，有指豆沙包因不遵從Wilson出席飯局而被飛出天使大本營，她一怒之下公開投訴，卻反被指因工作態度欠佳才被趕絕！對於被插在節目中經常甩舞，豆沙包澄清自己是習舞之人：「我細個學過幾年中國舞同芭蕾舞，但天使跳Hip Hop Jazz，我跳起上嚟好似冇乜力啫！」

豆沙包直認心直口快，卻不愛搬弄是非。	對於被天使拍檔圍剿，豆沙包（前左二）表現從容。	陳蕊蕊

心直口快

正所謂一沉百踩，原本搭晒膊頭的天使們突然幫口圍剿，豆沙包直言跟她們一向是朋友不是密友：「同佢哋都friend嘅，女仔圍埋就會雞啄唔斷，不過我哋都係工作時傾偈，私下少聯絡。」對於遭圍插，豆沙包並無怪責她們，反而幫口說是傳媒誇大事件。先有在《大咕窿》被迫簽「生死狀」喊爆事件，再發生這次口角，入行年多的豆沙包不怕被定型「是非精」嗎？她說：「唔驚！因為我講嘅都係事實！我知要改下自己心直口快嘅性格，但其實圈內應該要有唔同性格嘅人生存！」

王淑玲	Andrew Yu	《美女廚房》監製錢國偉（中）對一班天使非常照顧。

帶旺桃花

不過，為了遠離是非，豆沙包早前主動提議找玄學師傅改名轉運，結果從「梁懿晴」變「梁梓悠」，她笑說：「『晴晴』呢個名用咗好耐、太細路女，楊天命話我個名欠火，冇精神同遊魂咁，新名會令我諗嘢清晰啲，凡事三思後行！」新名除了對事業好外，還會帶旺桃花，難怪豆沙包咁鍾意！

陳蕊蕊 美味天使「柑桔」

「我同佢都幾啱玩，佢份人比較慢熱，要識落先多嘢講，佢亦係一個比較直腸直肚嘅人，不過我幾鍾意呢種性格嘅人。呢件事只係佢同Wilson之間有啲誤會，不過都雨過天青啦，希望佢可以開心番！」

王淑玲 美味天使「香蕉」

「我哋一直都好朋友，無論有冇呢件事，都唔會改變我對佢嘅睇法，發生事後，我都有sms佢，亦有出嚟飲嘢。佢份人係比較直接同爽，對佢嚟講有好有壞，希望佢離開天使之後，發展會更好。」

Andrew Yu 豆沙包經理人

「晴晴係一張白紙，佢出嚟第一份工就係入行娛樂圈，所以好多嘢都唔識，佢性格比較直腸直肚，從來都係有碗話碗，要慢慢適應，依家碰下釘就會知道點樣喺呢行生存，我知佢以後會小心講嘢。」

文：專案組 攝：馬永堅

髮型：Yuma@XENTER

服裝：SP Fashion

場地：BLOCK 1912