Lynn經過大前晚一小時攻城後，昨晚撐着一雙黑眼圈出席蘭桂坊活動，對於有關城城的問題，她均「哦哦」，並暗示城城的答案等同她的答案。

遲啲再攻城

對於攻城一小時在城城家做過甚麼？Lynn說：「唔回應啦，係你哋寫啫，唔好諗咁多。佢都回應咗你哋問佢嘅問題。（派定心丸？）佢係回應你哋問佢嘅問題啫，（城城話同Mango係朋友關係，你感覺點？）冇唔開心過，都冇事發生。（返來香港即上城城家，係咪好掛住佢？）我都唔回應啦，（係咪城城掛住你？）我諗唔到點答！（Mango話城城諗多咗？）之前一向都冇講嘢，Aaron（城城）經已回應咗，我冇嘢回應。（城城同你出頭有乜感覺？）我冇呢個感覺。」

Lynn認為「撐腰」並非甚麼特別事，故沒有甚麼好講，與城城的關係仍然是好朋友。問到與城城是否加強了信任？她說：「不嬲都冇問題，（兩人關係雨過天青？）不嬲天氣都好好啦！（此刻心情有冇勝利者感覺？）今晚氣氛好好。」更暗示攻城會「遲啲先」，可說陸續有來。

想停止戰爭

昨晚出席另一活動的Mango，表示對Lynn攻城一粒鐘全不知情，也是從記者口中才得知，並一面認真地說：「唔講其他嘢，都唔關我事，（同佢哋劃清界線？）唔好用呢啲字眼，我冇講過，（唔想隔空罵戰？）係，想停止戰爭，人哋睇好似戰爭，我唔想大家誤會。今日嚟做嘢，輕鬆心情，（覺唔覺得二打一？）乜嘢二打一？打機呀？其實係大家諗多咗，睇咗呢啲報道，唔開心係畀人誤會我。（會唔會祝福佢哋？）會祝福。」此外，身為關懷愛滋慈善之星的謝婷婷，透露剛過去的萬聖節與姪仔Lucas扮鬼扮馬，但沒有出街。