樂壇新人羽翹（Ava）日前冒寒風以性感打扮現身銅鑼灣，與同行男友人甜蜜逛街，二人除自拍留影外又一起挑選少布內衣，期間男方更情不自禁輕撫Ava面頰，動作親暱，恍如熱戀中小情侶。
日前寒流襲港，Ava依然身穿性感吊帶短裙，與型仔男友人現身JFT旗艦店，兩人全程有講有笑，態度親暱，容光煥發的Ava主攻性感衣服，不斷穿梭於試身間外，又拿起心儀靚衫與飾物隨身襯托，動態撩人，不禁令人想入非非，其「獵物」中不乏性感內衣，期間男友人更為Ava親挑胸圍，兩人關係似乎盡在不言中。
暗角玩自拍
於性感短裙區搜索一番後，Ava與型男進入靚鞋區，Ava大晒美腿換上多對高踭鞋，她在俯身試鞋時，更浮現波罅，而男友人亦交足貨，一展紳士風度，蹲下為Ava扣上高踭鞋鞋扣。經過一輪掃貨後，兩人更於店內暗角處貼身自拍留倩影，猶如小情人般。
事後Ava接受電話訪問，極力否認兩人的戀人關係，她說：「唔係啦，嗰個唔係我男朋友，舊同學咁啱撞到，佢喺嗰度返工！」Ava又表示當日正為聖誕活動及年尾頒獎禮搜羅戰衣，至於輕撫面頰等親暱動作，Ava就解釋說：「係啱啱條頭髮勾住咗隻耳環，佢幫我整番咋，大家真係唔好誤會。（親密自拍喎？）角度問題，咁朋友耐冇見嘛，平日都會同fans自拍啦！」
唔諗感情事
談到千里姻緣一線牽，有緣再遇，Ava與男友人有否發展機會？她謂︰「依家都好忙，出席活動之餘，最近仲忙緊錄音工作，暫時唔會特別去諗感情事，順其自然啦，始終將來嘅嘢冇人知。」
採訪：音樂組 攝影：沈健程