基仔加盟英皇後首張大碟《you talkin' to me?》昨日推出，英皇隆而重之於酒店舉行新碟發布會，基仔竟以「黑超」造型出現，他笑言：「因為撞親玻璃．今日帶咗隻腫眼嚟，所以新碟應該『中硬』嘞。」現場則播出兩首基仔自編自導自演的MV。英皇行政總裁吳雨更上台祝賀基仔新碟反應好，並將為他舉行祝捷會。

基仔與吳雨（右）在台上祝酒後密密斟。

基仔被貼上金句的女性包圍，盡享「艷福」。

嘲「碌雞蛋」唔掂

事後，基仔解釋弄傷左眼的原因，原來他早幾天返父母屋企攞「Bear Bear衫」去萬聖節，可能因睡眠不足，開了木門後，竟忘了還有玻璃門便一頭撞下去，基仔笑謂：「當時阿爸阿媽睇住我撞，我係男子漢唔想佢哋擔心，咪即刻話冇事，其實係好痛㗎！之後幾日隻眼愈嚟愈腫同瘀，原本尋日要幫雜誌影相都要取消，聽日又要拍MV。（會唔會取消？）未知，或者拍我側面同女主角囉，其實冇爆缸（流血）已經係不幸中大幸。」基仔稱除服了消炎藥，他連古法「碌雞蛋」也試過數次，他笑言：「碌咗幾隻蛋但都係咁，證明唔得嘅。」

被踢爆戀事口窒

會上，司儀問基仔是否愛拍愛情題材，基仔竟口窒窒說：「因為我愛情……片經驗多。」問到現實中戀愛經驗時，基仔笑言：「幾十歲人實有啲嘅，三、五、七次都有嘅！」記者踢爆他是「從一而終」，基仔即支吾以對：「唔……咩啫，不如飲茶先！」再追問，基仔才無奈笑說：「係幾專一嘅，所以拍愛情片機會多啲囉。」

文：音樂組 攝：鄭家俊