鄧萃雯前晚與黎耀祥做《至八女人心》嘉賓，問到雯女有劉曉慶撐腰向方逸華推薦她做「視后」，雯女笑說：「咁都信？講笑啫，唔使咁認真，都開心佢撐我，送番套《巾幗梟雄》佢睇，我第一套大陸劇係佢推薦我拍嘅，佢知我水準去到邊。」雖然有人撐，但並未為雯女增信心，她坦言志在參與，每次台慶都感謝支持她的觀眾：「我唔鍾意競爭，永遠只同自己競爭，（睇好邊個？）唔講，唔諗咁多。」
另商天娥為舞台劇《石塘咀如花與大舊勝》宣傳，娥姐謂要忙綵排，但有空會出席頒獎禮：「我當去派對，戥視帝、視后高興下，（有冇諗自己做視后？）吓？唔係啩？希望出年啦，視帝就羅嘉良同黎耀祥爭，視后就亂啲，雯女、佘詩曼、楊怡仲有袁詠儀，我或者轉去舞台劇嗰邊爭。」