傅穎（Theresa）跟棒棒堂成員敖犬最近傳出緋聞，前日敖犬牛一，Theresa只是SMS祝賀對方，連禮物也欠奉，她斬釘截鐵表示跟敖犬「冇可能」，大家只是朋友！
昨午Theresa一身便服裝扮在灣仔一間茶餐廳出現，見她掏腰包落柯打叫了幾盒雞扒飯，期間跟店員有講有笑，她說：「因為趕住做嘢，所以買飯盒上車食。」
短訊祝賀
前日（30日）是敖犬生日，問她可有致電祝賀對方？Theresa大方說：「我SMS祝賀佢，係好平常SMS冇乜特別，（有冇送禮物？）冇，大家心照算啦。」日前她在網誌上放上蛋糕照，被懷疑跟敖犬隔Blog傳情，Theresa沒好氣說：「太過敏感啦！」跟敖犬「突然」傳出緋聞，她說：「係夾硬嚟，得啖笑，我哋知道係乜回事，當係電影宣傳。」她更斬釘截鐵表示：「一定冇可能，我哋只係朋友，大家唔好太敏感。」她強調緋聞不是事實，故不想多作談論。
專注事業
問到Theresa其感情生活，Theresa形容「一片空白」，她只想專注事業發展，她說：「我要學唱歌、學跳舞，又要上普通話、日文堂，好似返學咁好忙，真係冇諗其他嘢。」轉投星皓新公司後，她明顯開朗了，她笑說：「係呀，開心咗好多，心情都輕鬆晒。」說罷她拿着外賣跟助手匆匆離開，也不忘禮貌跟記者道別。
文︰音樂組