昨早「雙J」、劉浩龍、狄龍、邵音音、新人李治廷及導演郭子健為新片《Frozen》參與開鏡拜神。八八年出生的JM透露，因劇情時空交錯，今次反過來扮演八二年出生的衞蘭媽媽，絕對是演技大挑戰。

一眾演員及導演切燒豬拜神，祈求新片大收。

李治廷有幸與「雙J」拍親熱戲，現實中亦能「左擁右抱」。

JM不諱言：「故事以八十年代為背景，所以我腦裏面一片空白，惟有做多啲參考工夫。（有冇模仿對象？）梅艷芳姐姐囉。（靠造型老化自己？）我覺得啲戲服好潮，我諗第二時自己都會係潮媽，會同個女着母女裝出街。」

隔褸摩擦親熱

有指「雙J」因英文名同叫Janice而搞錯被派演角色，兩女表示已有默契，導演會以JM叫文詠珊，而衞蘭則以其姓氏Vidal來稱呼。

有幸於戲中與「雙J」拍親熱戲的李治廷，問到親熱程度有幾高時，他竟衝口而出謂：「總之親親地啦。（床戲？）咁又親得滯，應該會褸同褸之間摩擦囉。」此話一出全場起哄。而扮演私家偵探的劉浩龍則表示今年先後接拍五套電影，笑言留鬚對事業有幫助。自爆十分喜歡小朋友的劉浩龍，今次角色育有一名九個月大BB，令他興奮非常。據悉，《Frozen》投資約千萬，拍竣後有意報名參加明年的康城電影節。 文：影視組