劉嘉玲同梁朝偉結婚後不設防，打算盡快生B組織三人家庭。不過前排八太就見嘉玲撇低老公同朋友食飯，到凌晨先捨得走人。食飽飽嘅嘉玲仲繼續同朋友研究下場好去處，唔願返屋企咁款。睇嚟恨生B恨到出口嘅嘉玲，都要學灰姑娘咁早啲返歸努力造人喇。
嘉玲同偉仔結咗婚一年有多，嘉玲表明想同偉仔生個精靈BB，兩個仲不設防努力造人，八太都好希望佢哋快啲一家三口。不過偉仔同嘉玲都係大忙人，電影一部接一部，仲要成日飛嚟飛去，周不時都分隔兩地，要造人都要夾啱時間先得架。
未夠喉傾下場
不過最近偉仔留喺香港練功，嘉玲亦冇戲拍，難得可以朝夕相對，理應努力造人先係，但前排八太就見到嘉玲撇低老公，同成班朋友去咗銅鑼灣歎日本菜，仲食到凌晨十二點幾先捨得埋單走人。
嘉玲出門口時，八太仲以為佢會拿拿聲返屋企陪老公，點知佢好似未夠喉咁款，同幾個朋友研究下一場好去處。不過同行幾個女友人個個都say no，搞到嘉玲鬼咁掃興，即刻頭耷耷扁晒嘴，逐一同佢哋講拜拜後就乖乖返歸。不過嘉玲返到屋企都凌晨點幾鐘，偉仔應該已經瞓咗覺，兩個又錯過造人機會。
軒仔扮靚食飯
嘉玲返歸後冇耐，八太就見到張敬軒、蘇永康同黃偉文食飽出嚟。雖然軒仔着得非常靚仔，但冇好朋友關智斌喺身邊嘅佢顯得悶悶不樂，就算有個低胸打扮嘅索女喺隔籬，都依然提唔起勁，望都唔望對方就急急腳上車走人。
文、攝：追蹤組