三場馬拉松式「慈善K唱遊」活動昨日順利完成，江若琳（Elanne）、Square、羽翹及張繼聰（Louis）等應邀現身，大會更安排歌迷與偶像同台合唱，場面熱鬧。

唱悲情歌發洩

半年未有唱卡拉OK的Elanne，甫現身即大呼心情興奮：「好開心，今日（昨日）感覺唔似做嘢，頭先我忍唔住狂點歌，被大會話『夠啦夠啦』，要留時間畀Square。」

Elanne透露平日喜歡唱林憶蓮、萬芳及許美靜等八十年代經典歌，被朋友取笑為老人精：「佢哋話我唔係活喺呢個年代，因為我唔識唱新歌，淨係唱《明知故犯》、《新不了情》嗰啲。唱K嗰陣鍾意唱悲情歌發洩，有時我都會喊，好似《至少還有你》就令我諗起過咗身嘅爺爺！」

對着小妹妹張繼聰即發揮父愛，蹲下跟對方合唱。

官恩娜上節目唱歌一鳴驚人，吸納不少歌迷。

官恩娜聲帶累

同場的Louis就直言已經常唱歌，故入行後很少到卡拉OK消遣，他說：「最近都已經係年幾前，有場波好想睇，但係朋友唔得閒陪我，於是自己去開咗間K房睇，太太都話我太瘋狂！」至於聲帶發炎的羽翹表示醫生要她一個月不說話，但她笑言：「傻㗎咩？除非毒啞我。」而前晚出席第二場K唱遊的官恩娜，坦言聲帶好攰：「好彩有fans幫我唱，但係我擔心自己忍唔到，因為我真係好鍾意唱歌！」

文、攝：音樂組