昨日兩位韓星金荷娜和姜至奐（前譯：姜志煥）為宣傳新戲《我女友係零零七》來港宣傳，二人分頭「個人遊」由朝玩到晚，素顏出巡的金荷娜為爭取時間購物，婉拒大會為她洗塵，誓要玩轉全港九！
近日「韓流」襲港，繼Rain來港宣傳演唱會後，昨日兩位韓星緋聞男女主角姜至奐和金荷娜亦抵港宣傳電影《我女友係零零七》，昨午二人於十二時在機場出閘，現場有數十fans帶同金荷娜的巨型海報及拉起橫額接機，有fans見到偶像姜至奐步出，即一擁而上獻花，場面混亂，之後他們往機場附近酒店稍事休息，再分道揚鑣出發，展開一日在港「個人遊」旅程。
食完買攞折頭
素顏打扮的金荷娜一行六人在1時45分便服出發，她先到達中環擺花街遊覽留倩影，她與助手拿着地圖左睇右睇，然後步行到摩囉街睇古董，逛完一輪後便到附近酒家「醫肚」，可能香港天氣較韓國熱，歎完茶後金荷娜又到果汁店飲嘢，更不介意與助手「分甘同味」，一支飲管兩份飲。之後，金荷娜開始「出手」掃貨，在一間錶店買了一隻勞力士鑽石鋼錶，估計價值16萬，認真豪氣，「熱身」過後，金荷娜再到名店林立的置地廣場狂掃化妝品，更即時做會員攞折頭，認真精打細算！瘋狂「血拼」後，一行人拉隊到ifc的翡翠拉麵小籠包食晚飯。
嗒糖水打書釘
姜至奐全日沒有陪同緋聞女友行街Shopping，他卻到了尖沙咀星光大道遊覽，其後經過廣東道時，姜至奐似乎對本地娛樂新聞感興趣，駐足睇雜誌，之後到了附近著名的糖水店食甜品，據知姜至奐有興趣晚上到蘭桂坊消遣，體驗香港的夜生活。
profile
姜至奐
出生日期：77年3月20日
入行經過：02年演出音樂劇
曾拍電影：《我女友係零零七》、《電影就是電影》、《訪問者》等
曾拍劇集：《加油金順》、《京城緋聞》、《快刀洪吉童》等
金荷娜
出生日期：78年2月21日
入行經過：模特兒選拔賽
曾拍電影：《情迷戇豬男》、《我女友係零零七》、《我的Band5男友》等
曾拍劇集：《鋼琴別戀》、《玻璃花》、《On Air》等
文：專案組