身為96年亞姐冠軍的陳煒，鬧起師妹(18)劉伊心時，毫不留情地說：「我好討厭佢喺問答環節講大話，喺台前唔認戴牙套，返到後台又認，搞到話佢有戴牙套嗰位專業牙醫好冇面，仲要司儀幫佢補鑊，做牙套咪做牙套囉，我都有做但我敢認，我最唔鍾意人講大話，佢根本唔尊重觀眾，所以喺問答環節我畀佢最低分。（但佢照入圍噃！）入圍啫，咁佢個樣同身材都OK嘅！」

唇紅齒白的R劉伊心先否認後再承認戴牙套，惹來講大話的指控。

大話劉伊心有牙為證。

Ana R.彈欠自然美

陳煒又力斥將佳麗拆件解構的「美麗大測試」環節考慮不周，她說：「亞視不嬲鍾意搞gimmick，本來分組評佳麗無可厚非，亦都幾有娛樂價值，但要佳麗企喺板後面凸胸，喺現場睇就覺得好笑，但觀眾透過鏡頭睇，可能會唔舒服，我諗冇塊板會好啲。好在係搵女model上台解構，如果係搵男嘉賓，大家會仲唔舒服。」

另一評判Ana R.昨日出席婚紗騷時，亦狠批亞姐佳麗欠缺自然美，她說：「依家多咗女仔整容，無論樣定身材，整咗都好易睇得出，我想揀選發自內在美嘅佳麗但好難，我希望睇到佳麗表現自信同真正嘅自己。我有兩個心水都入咗圍，但為免影響賽果，我唔會講名。」

葉家寶撐冇問題

而亞姐負責人葉家寶回應批評時說：「喺製作上冇呢種感覺，只想將佳麗作更深入嘅全面睇，凸顯佢哋健康美。（夾胸畫面賣弄色情？）唔會，噱頭嚟啫，到依家未收到任何投訴，賽制係咁玩法，觀眾會覺得新鮮，評判亦唔會只睇個胸嚟評分。（劉伊心講大話？）呢個係女仔自己問題。（Ana R.話佳麗欠自然美！）有冇整容好難評定，留畀觀眾衡量。」

文：影視組