一向不忌諱自己平胸的阿Sa，昨日與吳君如、許紹雄、陸毅、樊少皇等出席王晶執導新片《美麗密令》拍攝，碰上四名身材索爆的靚女高海寧、梁政珏、「動漫Maggie」李曼筠及「翻版舒淇」林佳菱同以比堅尼登場，以恤衫襯超短褲上陣的阿Sa明知Cup數不及，即表情動作多多，不時偷望一眾靚女，又搞鬼地直豎拇指，成功吸引傳媒狂拍；其後阿Sa被安排站中間大合照，她即顯得渾身不自在，更尷尬得滿臉通紅。君如見狀便搞笑地教她擺出批（月爭）甫士「突圍」，怎料阿Sa真的錯手撞正高海寧大咪咪，場面搞笑。

阿Sa獲君如（左三）教路「批（月爭）」，豈料玩出火，真的誤批中身旁的高海寧。	眾演員影大合照，吸引眾多傳媒狂拍。	樊少皇（左）與陸毅跟性感打扮的李曼筠合照時，明顯「硬晒軚」。

唔認尷尬面紅

阿Sa受訪時不甘示弱，坦言在戲中亦會以三點式示人，並會近距離接觸巨乳，她說：「好勁o架，會挑戰尺度，同啲女仔仲有身體接觸同對打，塊面仲會接觸到佢哋個胸！（但你今日面紅喎？）胭脂重咗啲囉。（頭先你好似掂到高海寧，有咩感覺？）咪軟腍腍、暖笠笠囉！我夠有啦，之不過佢哋『大Ｄ』囉，我咪『大Ａ』囉！（會唔會羨慕？）我都有啦，（有冇覺得被比下去？）有吳君如喺度唔怕，（你搵君如墊底？）唔好咁講。」被問到是否特地穿上四吋高踭鞋一比高下時，阿Sa坦言：「個個都高我成個頭，經過服裝間見到呢對鞋咪借咗嚟着囉。」

王晶與四女合照期間，阿Sa不時偷望。

阿Sa十分鬼馬，竟向林佳菱等舉起拇指。

君如母女齊病

同場的吳君如則笑言：「我都想着泳衣呀！點知王晶同我講：『着泳衣使乜驚，我哋喜劇o黎o架！』聽到我火都嚟！好似我着泳衣係笑片咁。」君如又表示今次到內地拍戲不幸病倒，怎料女兒在香港亦同時病了，令她非常擔心，她說：「今次真係對唔住晶哥，我集中唔到，唔夠專業，好彩之後嘅戲都唔使離開香港。」王晶則說：「廿幾年前叫君如喺《求愛敢死隊》着泳衣，佢都係着潛水衣，唔通廿年後再叫佢着咩。」王晶坦言去年選港姐已留意高海寧，至於梁政珏則在電視發掘而出。