坐擁幾億元身家嘅沈嘉偉，一家四口住喺半山幾千呎豪宅，工人都有幾個，平時用嚟代步嘅過百萬靚車都起碼有七至八架。

近年成日話豆斗好想為沈家添番個男丁「續香燈」，出盡方法在家中設壇及拜會寧波車求子，奈何都係「食詐胡」。雖然至今未能生個男Ｂ，但係沈嘉偉依然好愛錫兩個寶貝女，做埋廿四孝老竇。

好奇玩水柱

八太日前喺圓方見到沈嘉偉拖住細女婷婷同埋沈弟，期間經過大堂一個小型水池時，婷婷就即刻fing開爹哋隻手，好好奇咁行近水柱伸手玩水。

一行三人就去咗附近一間高級餐廳會合豆斗。食咗唔夠一個鐘，就見豆斗拖住囡囡去咗兩次洗手間，再過多半小時，又見豆斗帶囡囡步出餐廳，當然又係去洗手間啦！

埋單門口等

沈嘉偉做慣生意，零舍識得掌握時間，趁住老婆同囡囡去咗廁所，即刻埋單出門口等。

唔夠幾分鐘，「舒服晒」嘅婷婷拖住媽咪喺洗手間出嚟，不過一見到爹哋，即刻「打完齋唔要和尚」，丟低媽咪飛身撲向爹哋，一手拖住爹哋，沈嘉偉當堂「冧晒」！婷婷咁識氹人，難怪深得爹哋愛錫啦！