無綫42周年台慶亮燈儀式昨晚假將軍澳電視廣播城進行，超過一百四十位演員出席，其中大多以戲服亮相，今年花旦與小生分成兩批站台，花旦除司儀汪明荃、鄭裕玲外，居中而站的為無綫全力催谷的新劇《宮心計》兩位女主角楊怡及佘詩曼，早前在《有營煮婦》中除剩bra的陳法拉亦無緣企中間。

小生方面備受器重的則要數站正正中間的陳豪及人氣急升的黎耀祥，至於「Laughing哥」謝天華則企在第二排右邊尾六位置，明顯唔多滿意。被傳簽約換獎的郭可盈，名字雖見於出席名單，但卻以身體不舒服為由缺席，視后大熱鄧萃雯則連出席名單也未見其名。

雯女可盈缺席

黎耀祥率領《巾幗梟雄》演員出場時，贏得現場歡呼掌聲，他表示：「之前同雯女去美國登台，佢留咗喺嗰邊玩，（特登唔返？）唔係，佢計劃咗stay，如果喺香港佢實出席。（傳郭可盈簽約換獎。）未聽過，我想雯女攞獎，柴九同四奶奶齊齊得獎係完美結局。（柴九攞硬㗎？）我信心ＯＫ，但呂良偉、羅嘉良有實力。（羅嘉良唔知邊個係柴九。）唔出奇，佢主力喺內地，可能冇睇，陣間問吓佢係咪真係冇睇。」

鄭嘉穎、佘詩曼這對分手緋聞情侶，落力宣傳新劇。	黎耀祥憑柴九「升呢」成功，躋身小生行列，企位顯身價。	鍾嘉欣低胸吊帶晚裝出場，突破乖乖女形象，而陳法拉則以戲服登場，稍欠睇頭。

有得角逐開心

被傳可憑《宮》劇奸角角逐視后的楊怡，昨晚備受公司重視，由去年的「二線」進身花旦，企正頭排，被問到有傳郭可盈簽約換獎，她說：「好呀！邊個攞冇所謂，最緊要《宮》收得，有得角逐已開心，雖然都想攞，但自知仲有地方要努力，留畀觀眾判斷。（有指你觀眾緣唔及鄧萃雯！）呢樣嘢好個人，唔係一句話概括，佢好資深，劇集早得到肯定，係我心目中嘅女主角。」

佘詩曼被問到有報道指郭可盈要劏佘，她說：「未睇，都未知邊個有份提名，我睇好雯女、楊怡，一人一個獎啦，唔知仲有冇獎可以借畀我呢？」

文：影視組