佘詩曼、楊怡、鄭嘉穎、陳豪、關菊英、米雪等，昨日到奧海城宣傳無綫台慶劇《宮心計》，吸引近五百人圍觀。當中緋聞男女阿佘與嘉穎，自上月傳出分手傳聞後首次碰頭，期間二人甚少交流，只偶作交談，本來還沒甚麼不妥，直至大會安排嘉穎抱住阿佘玩遊戲時，二人即表現生硬，並且流露尷尬神情，反觀楊怡、陳豪就玩得投入，與佘穎相映成趣。

事後，阿佘、嘉穎異口同聲不介意被擺上枱以情侶檔宣傳，又強調二人是朋友，見面不會尷尬。

視而不見	保持距離	甩身鬆晒

直認已分手

阿佘說：「今日先知有咁嘅安排（玩抱抱），都幾surprise，不過就冇尷尬。（見你哋抱住時個樣好緊張？）可能佢怕整跌我，因為我哋啲衫好長。（今次係咪傳分手之後第一次見？）之前拍宣傳片見過，不過公開就第一次。（你哋係咪真係分咗手？）係呀，我哋拍完《宮心計》分手，最近有新男主角就係陳豪、黃德斌。（有報道話你識咗富商而撇嘉穎？）覺得佢哋寫嘢不負責任、想像力豐富。（介唔介意再同嘉穎宣傳？）一定要一齊宣傳，希望我哋呢對螢幕情侶喺觀眾眼中好襯，深入民心係大家目的。（同嘉穎咩關係？）友好關係。（冇感情？）友好都係感情一種。」

做嘢還做嘢

嘉穎提到與阿佘的緋聞，卻較為避忌，不時拉開話題，他說：「我抱阿佘有咩感覺？宣傳嘅感覺。（傳分手後首次見面會否尷尬？）點解尷尬？呢啲唔理，都係緋聞嚟啫，做嘢還做嘢。（同阿佘有冇傾偈？）有，點解唔傾呀，朋友嚟㗎嘛。（對住阿佘笑得特別燦爛？）冇咁嘅事，陳豪同我講笑，我都笑得好燦爛。」

此外，有網友指劇裏演唐朝皇帝的陳豪，着錯漢朝龍袍，而劇集監製梅小青解釋：「好清楚知道，不過我哋唔係歷史劇，今次為視覺靚而創作靚戲服。」

文：影視組