徐淑敏（Suki）與未婚夫黃浩（Kenny）將於下月13、15及17日舉行婚宴，前後共設74圍。據知，除了梁靖琪擔任Wedding Planner外、姊妹團有呂慧儀及馬賽；而兄弟團方面亦已定人選，除了「鐵腳」鈴木仁外，郭品超及鄭元暢兩位型男亦甚有機會擔任兄弟，其中身處內地拍劇的鄭元暢更專誠向劇組請假來港出席15日的婚宴，兼會獻唱賀新人。
未婚夫解圍
而Suki雖然多次否認懷孕傳聞，不過昨日她與Kenny出席「羅浮宮」活動時，身穿吊帶紅色裙的她，孕婦腰肢粗圓特徵即時現形。當傳媒「篤爆」Suki着她承認「有餡」時，Suki聞言只不斷微笑，Kenny則幫忙解圍：「啱啱三個月。」全程笑至見牙唔見眼的Suki，問到守秘密辛不辛苦時？她即笑謂:「呢個係公開嘅秘密。（之前係咪因為合約問題同驚BB小器唔講得？）都有啲啦！我生完BB都要繼續履行合約。」
預產期四月
Suki透露BB預產期為明年四月初，不過現時還未能百分百肯定是男是女：「男女都無所謂，但都想第一胎係女。」Suki又表示手頭上的工作只排到本月17日，直至明年九月才會復工。Suki笑謂：「公司冇詐型，唔係都唔批啦！依家仲差一日影外景婚紗相，而18日過大禮。」 文：影視組