陳偉霆（William）前晚出席活動時，踎地兼夾胸扮周秀娜刷牙，揶揄對方的寫真集賣弄性感之餘，又力撐緋聞女友Angelababy的女神地位，直言周秀娜未夠班跟Baby睇齊！
前晚森美及陳志雲的真人騷「十人巷」舉行「黃白大戰」總決賽，邀得William、鄧紫棋（G.E.M.）及周柏豪擔任嘉賓，三人被考驗臨場反應，要求他們分別以貓步推銷牙膏、腳癬靈及止屙丸。
唔係競爭對手
負責賣牙膏的William像周秀娜上身般踎在地上雙手夾胸，又做出「周秀娜式」刷牙動作，更抵死地邊擦邊望心口，擺明揶揄對方。事後問William扮周秀娜可擔心Baby呷醋時，他即暗寸周秀娜未能挑戰Baby的女神地位：「佢哋都唔係競爭對手。公司有同事買咗佢（周秀娜）本寫真，我都有睇過，有啲相好深刻！」記者笑指他對周秀娜印象深刻過Baby，William即補鑊謂：「Baby都有深刻印象，寫真個景好靚。（人不如景？）救命呀！個人唔錯啦！」
朋友毋須避忌
日前William被拍得與Baby拍拖睇戲兼過夜，身在內地拍攝電影《美麗密令》的他未有回應，經理人霍汶希就謂：「一般朋友交往，經理人唔會阻止，最緊要唔好影響事業。」而Baby則澄清說：「我哋係成班人一齊去睇戲食飯，跟住成班人去佢屋企玩咗陣就走咗。」其經理人Kim亦表示是正常社交生活：「Baby有自己一班好朋友，朋友唔需要避忌，希望大家唔好咁敏感。」
文：音樂組 攝：鄭家俊