近日傅穎與金牌大風的合約糾紛鬧得滿城風雨，同樣曾是Cookies一分子的Miki，過去兩年都被舊公司投閒置散，加上傳出介入永安集團太子爺郭永淳婚姻，受到負面新聞影響下，她即變得低調。直至數月前，Miki獲金牌無條件「放生」後，上月正式重返娘家Starz People再戰江湖，相比好姊妹傅穎一切順利得多。

當街食雪糕

前日下午六時許，記者在銅鑼灣百德新街撞見身穿白色衫、挽着過萬元Balenciaga手袋的Miki，撇甩太子爺男友郭永淳前往銅鑼灣行街，但她身邊卻多了個年約40歲的鬍鬚男觀音兵。初時見二人手持雪糕邊行邊食，每當經過時裝店時，Miki都留意櫥窗的公仔，在附近兜了一圈後，二人進入京士頓街adidas舖頭。

露行蹤尷尬

甫進店內，Miki隨即睇衫又睇鞋，而鬍鬚男未有離開她的視線範圍，未幾Miki睇中一對白色波鞋，試鞋時，鬍鬚男亦全程傍到實，擾攘了半小時，見Miki拿着大袋戰利品步出，兩人其後步行到附近的士站等車，但發現記者拍照即表現尷尬，不過，上車前Miki先向記者揮手道別，然後與鬍鬚男乘的士離開。

文、攝：追蹤組