容祖兒出道至今已有十年，一直深受廣告商愛戴，又舉行多次巡迴演唱會，工作量排山倒海，加上投資獨到，近年趁樓市暢旺一買一賣閒閒哋賺過千萬，難怪近日升呢成為億萬天后。昨日祖兒及陳奕迅（Eason）出席十一月舉行的「拉闊音樂會」記者會時，對於億萬天后之稱號，祖兒初時耍手擰頭否認：「一日未埋單都唔知，依家仲供緊，如果以市值去計係過億。」

記者指她可以退休？祖兒笑笑口說：「傻啦，仲對工作好大熱誠，日日都得個做字。」祖兒大讚其母眼光獨到，說：「全部都係阿媽投資，我負責供。」

而記者會上，祖兒和Eason不停鬥嘴，祖兒戲言每晚都想起Eason，並說：「陳奕迅你好嘢。」而不時在記者面前大讚祖兒唱得的Eason插嘴說：「唔會喺佢面前讚佢，怕佢囂過我。」

Eason腳粗累事

Eason坦言一直都想與祖兒合作舉行音樂會，今次終於成事，問到會否有辣身舞？Eason避忌說：「費事啦，怕畀人做新聞。」身旁的祖兒輕拍Eason膊頭說：「放心，我同你一定唔會有緋聞。」有榕樹腳之稱的Eason透露因與祖兒同一排舞老師，曾模仿過祖兒在個唱上傾斜45度的動作，可惜失敗而回，他說：「因為隻腳圓周太粗。」

採訪：音樂組