郭羨妮（Sonija）和郭晉安早前到東莞擔任剪綵嘉賓，二人在當地甚受歡迎，Sonija更以一襲由媽咪親手縫製的低胸閃片裙獻唱，掀起高潮！
郭晉安和郭羨妮這對《古靈精探B》拍檔，早前拍住上到東莞搵真銀，兩人獲一間大型的傢俬店邀請擔任剪綵嘉賓兼獻唱，現場並有煙火表演，吸引過千市民圍觀。
全街貼滿海報
不過當日卻出現少許混亂，安仔說：「老闆帶我哋參觀佢哋近萬呎嘅傢俬舖，因為有好多人追逐睇明星，我見到一個人打爛完玻璃瓶，仲跌埋落地，原本想過去睇吓佢有冇事，但太混亂被人拉走咗。」
Sonija亦表示沒想到宣傳攻勢這樣厲害，她說：「大陸好誇張，去到東莞見到全條街都貼滿我同安仔嘅Poster，仲有公路嘅大型燈箱，真係好勁。」
逐塊閃片釘上
穿着低胸閃片裙的Sonija在台上獻唱時，即掀起活動高潮，她笑言這條裙是特別訂製：「媽咪花咗一個月時間幫我縫製呢條裙，佢好有心機逐塊逐塊閃片釘上去，我試過幫手，可惜愈幫愈忙，最後媽咪要趕工到凌晨五點幾至造得起。」
安仔和Sonija坦言十分滿意酬勞，Sonija說會好好報答媽咪：「我講笑話要食鮑魚就要努力釘，媽咪真係對我好好，希望遲啲可以買番層樓畀佢，不過仲物色緊。」
文：專案組