無懼外界抨擊的周秀娜前日現身科技大學，出席「解讀周秀娜現象」講座，雖然現場座無虛席，但周秀娜表現並不理想，完場後被學生批評她廢話連篇兼膚淺，沒有為講座作準備之餘，全程更是答非所問。

備受抨擊的周秀娜，於活動後離開時顯得悶悶不樂，她急不及待找來男友慰藉，相約於尖沙咀齊齊歎日本菜。當周秀娜乘車到達尖沙咀時，見有記者拍照時木無表情，急急腳步入餐廳。

強顏歡笑道別

至晚上十二時許，周秀娜與男友步出，被追問有否覺自己學識少及需要再進修時，她說：「有呀，其實一直都想進修。（講座中獻醜，講得唔好？）係呀？我不嬲都唔識講嘢，加上我同啲學生差唔多年紀，唔好話教佢哋，只係普通傾下偈囉。」說罷即乘男友車直返西環寓所，臨入閘前她亦強顏歡笑與記者揮手道別。

Baby唔熟唔講

另外，昨日Angelababy出席活動時，被問到會否想如周秀娜般出席同類講座？她說：「未有呢啲人搵，所以唔會特別諗，但有人搵都會開心。（覺得自己有冇資格？）要睇下咩話題，講自己嘢應該冇問題。（咁講o靚模呢？）唔得，唔係好熟。（抗拒o靚模稱號？）冇乜所謂，如果有人喺街咁叫我都冇所謂，只不過係一個稱呼。」文：追蹤組