由模特兒轉行做歌手的官恩娜，04年已開始拿着結他自彈自唱，可惜外間一直只留意她的身材和緋聞。她表示不少朋友曾勸她放棄唱歌，她說：「試過有朋友問我呢排忙緊乜，我話錄歌，對方即話：『吓，仲有碟出？錄嚟做乜？唔好浪費時間啦！』聽咗好唔開心，但知道朋友出於善意，都質疑過自己係咪適合再做歌手。」

不過Ella憑着一份堅持，每次有機會演出都會全情投入，並經常留在家中練結他，Ella高舉十隻手指向記者說：「睇吓我冇gel甲（水晶甲）㗎，因為我成日練結他，指甲唔可以靚靚咁見人。我唔理大家係咪覺得我好搞笑，但我真係好鍾意唱歌，每次有機會攞起咪都會盡力去唱。」

羨慕謝安琪成就

受人注目後，Ella被網民力捧，更將她與樂壇天后謝安琪（Kay）相比。Ella直言感覺飄飄然：「少少啦，可能傻人有傻福！覺得自己今年事業、愛情都好順利，但只會畀自己享受呢一刻嘅快樂，之後就要畀心機做番正常嘢，同練好啲歌。我覺得Kay唱得好好，人又聰明叻女，我都好羨慕佢有事業、老公同BB，好圓滿呀！」