潮媽Kelly昨日穿桃紅短裙襯長boots，現身救世軍油麻地長者地區服務中心派月餅給老人家，現場有一班小朋友做義工協助Kelly，初為人母的她對小孩們照顧十足，盡顯母親風範。

Kelly有仔萬事足，提起「蝦餃仔」即滔滔不絕。（資料圖片）

貴為一子之母的Kelly，對住一班小朋友母性盡現。

餵完人奶

Kelly謂已向公司請假度中秋，還自爆：「公公（陳父）送咗五個燈籠畀個孫，五年都玩唔晒。」台下有婆婆即說：「三年抱兩。」Kelly聞言由心裏笑出來：「承你貴言，三年抱兩最理想，因為佗得唔辛苦，依家等復原先，一年後再計劃。」

Kelly提到「蝦餃仔」即滔滔不絕：「佢玩燈籠好開心，我仲畀月餅佢聞，點知佢即刻伸脷，幾乎縮都縮唔切。（仲有冇餵人奶？）完咗，兩個幾月夠皮。」Kelly又謂收工後要趕返家，趁老公未放工時霸住湊仔，並笑說：「老公同我爭抱，好enjoy。」

憑歌寄意

有仔萬事足的Kelly，坦言現在要仔唔要錢，工作以簡單為主，農曆新年推出的新碟更會送首歌給「蝦餃仔」，Kelly透露：「會將《戀愛情色》改國語版，歌名未定，但會保留kiss me boy呢句歌詞。」

採訪：音樂組