徐子珊穿上鮮紅色晚裝出席古董錶活動，獲大會送上全球只得一隻的古董錶，令她愛不釋手。她表示最近受到朋友影響，亦愛上了收藏古董錶的習慣，覺得可以保值，但母親則認為買樓最實際，故現在要積極工作儲錢。她謂當年榮獲港姐冠軍時，獲贈三隻分別六十萬和二十萬的錶，但因太矜貴至今仍很少戴，而后冠一直放在家中，她說：「媽咪早排先問我個后冠放咗喺邊，原來佢睇中后冠上面可以拆落嚟嘅吊墜，我唔介意同媽咪分享嘅。」言談間她突然醒覺家中太多貴重寶物，急問記者是否太過危險。