gag神今期可以「抖一抖」，因為今次請來張繼聰幫手「出gag」，阿聰原來都收收埋埋唔少古怪gag題，阿聰話gag題聽似簡單，其實先最有難度，亦如阿聰所料，鄭融同鄧麗欣都被問題考起。
問題：「女家親戚」猜武打男藝人？
答案：梁家仁
鄧麗欣（Stephy）見到gag神就已經話定自己估gag好水皮，話會盡力而為，一聽完條題，Stephy就諗到托晒腮然後答：「呂良偉……！哎吔我唔知呀，我亂噏咋！」gag神再畀提示，Stephy就搶答：「甄子丹、係咪呂方呀？」當知道全部猜錯，Stephy終於舉手投降，但最搞笑是gag神講埋答案給Stephy聽，Stephy竟然諗唔通反問：「點解呀！」
鄭融呢隻辣椒仔，聽完問題說：「好似聽過喎！等等……等我諗一諗。」不過，時間一分一秒過去，她仍然想不出答案，即改口風：「嘩……好深，好難呀！」gag神已經畀晒「貼士」，鄭融最後都失敗投降，當鄭融聽到答案原來是「梁家仁」即死不認輸笑言：「我聽嗰個答案都唔係咁嘅。」
麥浚龍（Juno）聽完問題顯得毫無頭緒，gag神給他「貼士」，指答案是拍功夫片的男藝人，Juno即時一輪嘴答：「成龍？（錯！）甄子丹？（唔啱！）」gag神提議Juno可朝着「女家」的方向去想，Juno即說：「呂方！」gag神給最後提示「老婆嘅外家通常叫乜？」Juno終於如夢初醒：「我知啦，娘家……梁家仁囉。」