Fiona、周柏豪及Dear Jane昨日應新城電台邀請到青衣一間中學表演。未知是否受「走陰」陰霾影響，昨日Fiona突然「封腿」，穿着吊帶長裙現身。席間柏豪盡顯男士風度，不時提醒對方不要烏低身免走光之餘，卻將Fiona「走陰」一事盡情嘲笑。他說：「啲格仔係打得大咗啲，下次你自備啦，幫自己打埋格仔。」Fiona聞言即瞪實柏豪，非常激氣。

緋聞男友零慰問

她解釋當晚的打扮並不性感，只是格仔打得太誇張，令人有所遐想。她笑說：「開頭公司同事話畀我知報道話我『走陰』，我以為係『走音』，搞到我好激動，因為自己好努力去唱，點知同事叫我冷靜，唔係音樂個音，係陰天個陰。其實兩樣我都介意，但我已經着打底褲啦，冇諗過攝記會去到台邊低炒。」問到緋聞男友房祖名及方大同有否致電慰問？Fiona竟自嘲說：「冇呀，佢對我『走陰』冇興趣！（以後做格仔人？）我鍾意食格仔餅多啲。」

柏豪盼有人認同

另外，柏豪拿着結他自彈自唱時，咪架突然倒下，令台下中學生爆笑。他對此說：「唔尷尬，都幾得意吖，畀大家感受吓唱現場嘅蝦碌情況。」他透露最近與官恩娜拍劇，得悉對方最近在《超級巨聲》一鳴驚人，替官恩娜非常開心，並希望自己亦有機會獲著名監製所認同。

文：音樂組