Theresa雖與金牌仍有兩年合約，但Theresa與鄧麗欣（Stephy）因爭做一姐屢傳不和，加上Theresa早前獻唱時被網友狂插為「傅走音」，有傳陳輝虹掌管唱片和經理人部門後，金牌決意去蕪存菁，搞不和兼走音的Theresa被列為棄將，雙方關係日趨惡劣，勢孤力弱的Theresa就連日前慶祝25歲生日，同公司的歌手只有小肥和唐素琪拍短片祝賀，其他同門歌手如Stephy、吳雨霏、方力申、鄭中基、梁漢文等全部冇影，令Theresa更心灰意冷，主動求去。
「會尊重陳輝虹」
消息指金牌亦一早有意放棄Theresa，皆因她入行多年在歌、影壇發展一般，幸好寫真集年年賣個滿堂紅，成為宅男女神才得以力保人氣。不過，據知Theresa早前連衰兩鑊得罪無綫，第一宗罪是她私下答應無綫收費電視（Pay台）出trip，卻沒通知金牌，臨出發前卻反口，搞到無綫一鑊泡；第二宗罪是有次Theresa拍下短片讓有線獨家播，結果觸怒無綫，以後凡Theresa的活動無綫都拒派人採訪，有傳金牌認為Theresa已沒利用價值，決定放她一條生路。
記者致電Theresa求證，她澄清「兩宗罪」指控只屬誤會：「好耐之前答應Pay台，但公司卻推了；至於第二單，本來有線同無綫都想我畀片，但無綫話要有咪牌至播。」至於有傳金牌覺得她冇利用價值放生她？她平靜說：「我保持緘默，喺公司七年，無論佢哋覺得我幫唔幫到公司，但都畀過機會我發展。（唔嬲？）希望大家往後日子都順利，個個都好。（決心離開？）所有嘢都尊重陳輝虹。」
吞吐講Stephy
而身在外地的陳輝虹在電話中承認Theresa主動要求跟公司解約：「大家有分歧，勉強做唔到，祝佢以後事事順利。（使唔使Theresa賠償？）唔使，佢都賠唔到幾多，無條件畀佢走，今日留一線，他日好相見。」不過，陳輝虹表示金牌與Talent Bang共同擁有Theresa的經理人合約，若要解約須三方同意，記者致電Talent Bang負責人和Pay台高層彭濟材，但至截稿前未有回覆。
此外，昨日Theresa出席食店開幕活動時，問Stephy有冇祝她生日？Theresa吞吐說：「打電話、SMS唔係咁重要，我間歇性失聰。」
文：音樂組