王祖藍外形敦厚，而在王爸爸去世後，他亦負起照顧家人的責任，絕對是眾人眼中的好好先生。不過原來這位好好先生童年是「大壞蛋」一名，肆意欺負阿斌。與阿斌談起童年的荒唐往事，祖藍亦忍不住自責「賤格」。

阿斌（左）小時候曾被祖藍用張櫈夾住嚟打，真係冇陰功。	徐子珊	梁嘉琪

往事一 惡人先告狀

阿斌：「因為阿哥畀人嘅印象好乖，話佢打人實冇人信，反而話我打佢就個個都信。有次阿媽喺出面打緊牌，阿哥竟然用張櫈夾住我係咁打，痛到我係咁叫。」

祖藍：「係呀，當時我仲要主動打畀阿媽，話我畀細佬打！哈哈！我都話我細個嗰陣真係大魔頭嚟㗎啦！」

往事二 好嘢益自己

祖藍：「我哋以前乜都爭一餐嘅，絕對唔介意骨肉相殘。但我有樣嘢好賤格，每次有新玩具玩，我就會好開心擸晒啲主角，只係留番啲配角畀細佬玩，我都覺得自己明恰佢。」

阿斌：「係呀，所以到我哋大個咗之後，阿哥成日話啲女仔畀我『擸』晒，佢覺得呢個係佢報應喎。」

往事三 內疚送厚禮

阿斌：「有次我小四嘅時候同阿哥打交，唔知點解佢整親我隻手指，之後佢唔知係咪良心發現，佢竟然買咗盒好靚嘅鉛筆box set送畀我，嗰吓都幾感動。」

祖藍：「俗語有話『打死不離親兄弟』，我同細佬就算點打生打死都好，到咗打機嘅時候，我哋就會合作過關，我負責諗戰術，佢就負責實戰。」

好哥哥街知巷聞

徐子珊

「我同祖藍熟係因為合作《矮仔多情》，拍戲嘅時候佢好照顧我，有問題會主動同我傾喎。雖然我唔知佢同屋企人點相處，但我自己就好想有一個咁嘅阿哥，一來我淨係得個家姐，二來我覺得佢絕對照顧到我保護到我，係好哥哥嘅理想人選。」

梁嘉琪

「祖藍絕對係一個一百分嘅好哥哥，以我認識嘅佢，無論佢細佬發生咩事，都會好有耐性咁同佢傾偈。佢同細佬真係好close，就算佢幾忙，只要細佬有煩惱，佢都會第一時間幫手解決，我覺得佢嘅緊張程度，似足爸爸對囝囝一樣。」

後記：

雖然祖藍的「臭史」數之不盡，不過阿斌卻表示長大後的祖藍，絕對是「零缺點」的哥哥：「大個咗之後，無論我點樣鑽牛角尖、發脾氣都好，我阿哥都一定忍我，我知佢真係好錫我。而且，佢每次賺到錢，唔係買間好啲嘅屋畀我哋，就係請晒我哋成家周圍去旅行，真係好開心！」