【羅婉玲廣州直擊】張敬軒如願在廣州星海音樂廳開音樂會，心情亢奮的他，竟在高官及媒體高層面前，公然擺阿媽個胸上枱，又講黃色笑話。另外，他本想請「緋聞情人」關智斌（Kenny）及王菀之（lvana）等任嘉賓，可惜全部甩底，「檸檬」成籮上。
分別穿上白、藍兩色Salvatore Ferragamo的軒仔，前晚在星海音樂廳舉行一連兩場「張敬軒第1樂章音樂會」，極有面子的他，除請得一眾廣州高官、媒體高層捧場外，軒仔的雙親也有現身，惟張父張母分開坐，兼且張父作風低調，故未有亮相，只有身穿低胸裝的張母大方會傳媒。
獲男歌迷示愛
愛講爛Gag的軒仔，竟然當眾笑阿媽：「媽媽一向好慳，但佢都買咗件五位數字嘅低胸裝，阿媽其實好有料，唔係點生得我出，餵到我咁大。」令全場爆笑。個唱上，軒仔大受歌迷歡迎，有女歌迷送花兼要求抱抱，又有男歌迷示愛大叫：「我愛你。」
唔望個唱賺錢
軒仔接受訪問時，再次笑阿媽：「除咗『造』我嗰次咁少布外，今次係第二次，我贊成母乳餵哺。」問他個唱可否賺回300萬人民幣投資，軒仔不諱言場地只能容納1,500人，及僅可開兩場，故「唔蝕都偷笑」。談及軒仔只請小師妹孟楠任嘉賓，他坦言有請曾與他傳緋聞的Kenny及lvana，還有容祖兒及鄭希怡等，可惜各人齊請他食「檸檬」，他自嘲：「都要檢討吓我啲人緣。」至於可想過請關楚耀（Kelvin）？他謂不想給對方壓力，Kelvin應否亮相12月的環球音樂會，交由公司及Kelvin自己決定。