周秀娜（Chrissie）被指獅子開大口嚇窒導演自斷米路，即時一沉百踩，其中以死敵羅凱珊（Kama）說話最為有骨，「恭喜」之餘更開懷大笑暗寸對方若有價值自然有戲拍，一副心涼模樣。
前日Elite模特兒公司為即將開設的Elite Modeling School拍攝宣傳照，旗下model傾巢而出，包括有Mandy Lieu、「舊邦民女」Kama、陳沛嘉、楊崢、鈴木仁及呂慧儀等。
淑女上身唔肯露
其中Kama為學校的代言人之一，早前她被指為拍拖而退出模界，前日就否認說：「我一路都做緊model工作，只係早排要拍戲，所以先少咗出嚟。」記者問到其死敵周秀娜因獅子開大口而嚇怕導演，損失接拍大製作電影《七十二家租客》？Kama被問及片酬時說：「呢啲係公司傾嘅，（佢開五萬一組戲，拍得住影后？）恭喜佢囉，咁有人覺得佢值就自然有人搵佢㗎啦！」
記者指有導演認為她不值這個價？Kama忍不住哈哈大笑說：「傳聞呢啲嘢我就唔知喇！」她又透露希望有機會飾演突破角色，如聾啞人士，問到會否性感演出？她即淑女上身：「絕對唔會裸露囉！（你寫真都好性感？）寫真係一次啫，最重要係配合劇情。」
呂慧儀劃清界線
Kama明刀明槍寸死敵，但呂慧儀和Janice Man則擺明一副「當你冇到」的態度，其中有份拍攝《七十二家租客》的呂慧儀，被問及周秀娜獅子開大口一事？她即劃清界線說：「呢啲嘢我唔知喎，我只會努力做好自己，唔會睇其他人。」而Janice則說：「冇睇過呢個報道，因為呢排好忙，冇時間睇新聞，總之每個人做好本分啦！（有冇曾經開天索價？）呢啲嘢都係公司負責，自己冇諗過。」
對於被Kama暗寸，Chrissie回應說：「我作為電影新人，最重視劇本、導演同自己演出。」她更一再強調自己只是影圈新人。
採訪：名人組