昨日，周麗淇（Niki）、吳雨霏及名模周倩圯出席I.T旗下Isabel Marant的09秋冬時裝騷，大熱天時着住背心皮草到場的Niki頻頻嗌熱。她表示夏天最怕男人大汗，說：「男人大汗我一定接受唔到，有汗就有狐味，寧願揀有大肚腩都唔要有狐味，做我男友最忌禿頭同有狐味。（十個光頭九個富？）咁有錢就整吓個頭啦。」

Niki跟吳雨霏言談甚歡，非常投契。

周倩圯亦有出席時裝騷。

拒講家姐男友

問現時單身的她有否追求者？她就謂：「唔知，感覺唔到，媽咪都冇催，忙到死，工作為先。」Niki又言喜歡幫另一半設計形象，但就好忌穿情侶裝。對於薛凱琪抗拒被稱呼為「中女」，跟對方年紀相若的Niki說：「介唔介意好難講，要睇吓自己有幾長命，如果有80歲，咁40歲咪就係中女。」談到家姐周汶錡最近甚少露面，Niki表示家姐最近「好開心」，但就拒絕回應有關家姐男友的事。

吳雨霏心口痛

同場的吳雨霏瘦了一個碼，她表示近兩個星期有好多人都指她消瘦不少，但檢查過後醫生指她健康正常。她說：「我最近心口痛，醫生話我個胸骨貼近心口，如果有乜唔妥可以做手術將胸骨推前，但唔會影響胸部發育，因為係胸對落少少。我依家都積極增肥，但好難，自己不嬲食極都唔肥。」

文：名人組