莊思敏一句「四肢健全就可以學行catwalk」，旁人聽來覺得寸到爆，不過眾o靚模卻不認為有貶意，究竟是阿Q，還是高EQ？
Lavina：佢講得啱
「佢講得啱呀，如果唔係四肢健全，又點可以行騷呢？我喺騷後都有問過經理人同客戶我行成點，佢哋都話我行得OK，已經合格。其實我哋都有同莊思敏傾偈，佢有教我哋行騷。（是否人前人後兩個樣？）唔清楚，大家自己睇。」
Suey：向佢學習
「我唔覺得佢暗踩，係個人睇法唔同啫。佢係專業模特兒，見解可以接受，會向佢努力學習，佢係top model，好專業。」
Rainbow：客戶眼睛雪亮
「我知每次客戶搵我哋，都有客戶嘅原因，我相信我係一個四肢健全、身心健康嘅人，客戶眼睛係雪亮。不過我唔覺得佢係針對我哋，其實佢都有指點我哋行騷，教我哋點擺甫士。」
Monique：當係激勵
「我覺得佢嘅意思可能係想講每個人都有機會，睇吓自己識唔識得爭取，其實我冇親耳聽到，都唔知佢講過乜嘢，咪當係激勵說話囉！」
Roxanne：我唔係o靚模
「我唔覺得佢踩我，因為我唔係o靚模。佢喺後台都好nice，同我都有傾有講，市場需要有唔同種類嘅model。」
柑桔：模特兒唔係咁做
「莊思敏講得啱，模特兒唔係咁做，我諗佢唔係踩我哋嘅，喺後台都同我有傾有講。」