由《很長的Good Morning Miss》開始，森美小儀歌劇團合作至今已踏入第九年，第九個劇目《加樽抽》11月13日起，一連四日於九龍灣Star Hall演出。過往森小會與大約廿位學生小演員一同演出，但今次只有森小兩個人，而且分飾一家五口，用另類手法扭曲城中熱話，諷刺時弊。

森美說：「阿嫲去扮o靚模、阿爸變宅男、弟弟玩援交、家姐吸毒、阿媽溝仔，仲有搞福鱷宴，總之玩晒時下最潮嘅時事。」最近因在電視劇《古靈精探B》飾演神婆而人氣急升的阮小儀，雖然喜歡演戲，但仍擔心兩人分飾五角有難度，她說：「我哋希望有一幕『大場面』，係五個角色同時間喺個舞台上。（你哋得兩個人咋喎！）係，所以係我哋最大嘅挑戰。」

劇目懷舊

為甚麼這次舞台劇不加入小演員？森美說：「其實未諗到做乜之前，已經諗好咗明年十周年回顧過去所有劇目，到時希望可以同歷屆所有小演員合作。」至於這次劇目的名字由來，森美解說：「今次以80年代香港做藍本，《加樽抽》係因為當年家家戶戶都好興叫個仔攞個玻璃樽落樓下雜貨舖買生抽，『加樽抽』就係加多樽生抽嘅意思，好有當年嘅情懷。」

文：專案組　攝：吳文聰

Make-up : Perfect Stage Hair：Salon Go Ahead 場地：鳳城酒家