泳兒的新專輯《多一點泳兒》反應不俗，惟其感情生活未有着落，她笑稱：「愛情方面同我兩首歌一樣，『白紙』一張，兼十畫未有『一撇』，雖然今年我有桃花，但我暫時都係想專心做嘢先。」

怕醜唔主動

正所謂「女追男隔重紗」，問泳兒會否嘗試追男仔？她笑稱：「唔會，我係好被動㗎！（遇到心儀男仔呢？）都唔會呀，我好怕醜。（咁咪錯失良緣？）都係呀，我怕表白咗之後，驚朋友都冇得做仲衰。」泳兒承認入行至今緋聞寥寥可數，若真被傳又不介意，只是自己不會刻意製造緋聞。

泳兒表示今次新專輯有突破：「K歌同高難度嘅歌我都鍾意，當每次有人攞自己嘅歌去參加歌唱比賽，就覺得好有認受性。依家歌唱比賽有好多，可以發掘多啲人才。其實香港有好多臥虎藏龍，佢哋只係欠一個機會。」

壓力當動力

問到明年會否進軍紅館開騷？泳兒說：「未去諗呀，未定目標。無論係大場地定小場館，我嘅心態都一樣，就係做到最好，最緊要累積經驗。（進身天后級呢？）盡力啦，開始覺得有啲壓力，但會當係一個動力。」

採訪：German

攝影：黎志輝

化妝：Cyrus@Beauty Tech

髮型：Ziv@O4

服裝：Gallery de Vie

場地：Crave@銅鑼灣