作為一個領軍人物，鄭偉強坦言《香港亂噏》草創初期無人看好，包括有份做節目的一眾藝人，他說：「個節目起初諗住做五集，我睇得出啲藝員投入感唔夠，到個節目做起咗，佢哋至開始着緊番。（你點睇幕前嘅靈魂人物盧海鵬？）我同佢識咗三十幾年，佢絕對係藝術家，講到扮嘢，佢簡直係妖怪，同佢一齊都係做嘢多，真係玩得埋啲，要數88年我哋去溫哥華登台，我哋玩扮尋春。」

封周潤發搗蛋王

鄭偉強說：「記得嗰次同阿肥（沈殿霞）、關菊英、萬梓良成班去到downtown，我同阿鵬行喺前面，諗住試吓有冇女仔主動撩我哋，點知冇一個女仔肯『騷』我哋，真係好失威，不過呢啲都係年輕時嘅貪玩往事囉！」

談到曾經和自己鬥貪玩的百厭星，鄭偉強最難忘搗蛋王周潤發，他說：「嗰時發仔同發媽喺西環租屋住，發仔好多時收工冇車返屋企，要喺無綫化妝間瞓，我見佢咁辛苦咪租間房畀佢。嗰時我哋住一樓，發仔唔鍾意行樓梯，情願爬樹入屋，我老婆唔知，有次我老婆背住窗坐，發仔爬入屋仲大嗌，嚇到我老婆喊，發仔氹咗成晚，我老婆先肯原諒佢。不過發仔唔係成日都咁奀皮，佢一得閒就會主動做家務，又會幫手煮飯，好難得。」

難忘與小Ｓ合作

談到台灣電視歲月，鄭偉強難忘參與《康熙來了》的日子，他說：「我記得嗰時小Ｓ兩次生ＢＢ，第一次節目改名《康永當家》，小Ｓ復工至用番原名，到小Ｓ第二次生ＢＢ，我哋唔改名，知唔知點解？一來個節目太hit，二來我哋發覺小Ｓ好似有啲唔想做，於是就用個名嚟留住佢，睇到小Ｓ生完兩個ＢＢ，到依家啲觀眾都仲咁受落佢咁玩得，喺娛樂圈係好難得嘅事。」

Profile

鄭偉強，六十年代開始，在無綫美術部兼職，自此與電視業結下不解緣，89年因移民離開無綫，8日後悶極返港，輾轉加入亞視，00年亞視易手，獲派大信封，之後到內地及台灣電視圈闖蕩，去年重返亞視，再續電視神話。

文：影視組 攝：林蔚恩