「八模兵團」的A. Lin可謂愈戰愈勇，繼成功搶走Yumi飯碗拍攝《反斗西遊》Online Game廣告後，最近她又被防毒軟件《Norton》睇中，以網絡女警、聖誕女郎及鄰家女孩等造型拍廣告，再次攻陷「電車界」。

阿媽緊張

擔任代言人的她謂自己電腦亦曾被病毒入侵，更自爆有機會流出自己的全裸照在網上畀人任睇！她直說：「嗰次啲電腦病毒好勁，連電腦最勁嘅表哥都話救唔番，又唔敢攞出去畀人整，入面仲有自己細細個嘅沖涼相添，好可惜。」她笑謂其實最緊張的人是她媽媽，因為該相片已不見了，只剩下電腦「留底」，A. Lin更即時醒目地賣口乖表示「防毒」措施好緊要。除了「全裸照」不翼而飛，早前她亦遺失私人相機而感到不開心，被問到有否親熱相外洩時，她即回應：「梗係冇喇！」

逼爆差婆

在拍攝期間，A. Lin以差婆look最有睇頭，雖然制服像真度不足，但胸前「逼爆」效果相當吸引，加上低胸扮演在家中上網的少女，性感度實足以「殺死病毒」！

文：專案組