Ron和馬賽日前為無綫新劇《女王辦公室》拍攝一場求婚戲。劇情講述飾演「電車男」的Ron在巴士上向馬賽求婚，令馬賽高興得飛撲攬實他兼獻吻。雖然只是蜻蜓點水式錫面，不過奉上螢幕初吻的馬賽坦言感到尷尬，自嫌咀得較生硬。

馬賽表示：「初初拍攬戲真係好緊張，今次拍咀戲已經冇上次咁緊張，但係都有啲尷尬，有少少生硬，但係大家教我，作為好演員，一定要投入角色。」

Ron：呢套最少艷福

「身經百戰」的Ron自言拍過不少接吻鏡頭，今次拍攝只是小巫見大巫，絕無尷尬之感。他笑說：「好多監製都好錫我，成日寫啲咀戲畀我，不過每次都係點到即止。今次係一套輕鬆笑片，所以親熱鏡頭係得呢個，拍咁多套劇嚟講，呢套係最少艷福嘅一套。」

另外，於片中飾演「港女」性格的呂慧儀，昨日與馬賽以空姐造型拍外景。呂慧儀說：「呢個造型係阿姐（汪明荃）構思，其實我大多數戲服都係one piece裙，成日畀阿姐鬧做乜返工咁性感。（有冇試過激嬲阿姐？）阿姐私底下好好人，對我哋好好，又送蚊怕水畀我哋。今次個劇我做港女，成日對人呼呼喝喝，我又自度得閒無事照鏡補妝呢類小動作，去突出個角色。」

文：影視組