Kelly產後首度復出表演，昨日與李克勤齊齊為《星光熠熠耀保良》進行綵排，Kelly期間獲廣告商「金至尊」送上牛仔形兼有囝囝名字Chace的鑽石鏈，氹得她全程甜笑。

久未演出的Kelly坦言有點緊張，她又表示：「對上一次上台已經係今年2月，同阿倫一齊幫克勤演唱會做嘉賓，今次又係克勤，真係有緣。」Kelly指產後要靠運動減肥，每天做一小時瑜伽，她說：「唔可以太劇烈運動，加上餵人奶要食番多啲嘢，如果唔係唔夠奶。」

成晚冇覺好瞓

Kelly又透露囝囝前日首次打針即出現發燒情況，令到她騰晒雞、又驚兼心痛，她說：「打落去好心痛，囝囝『啊』一聲，谷到紅晒，停咗幾秒先再喊。其實姑娘已經減少佢痛楚，左右髀兩支針一齊打。」囝囝發燒令Kelly整晚不得安睡，每隔兩小時便起身為囝囝探熱，她更說：「我驚一支唔準，於是買咗兩支探熱針一齊探。」認真是個緊張大師。

Kelly跟克勤交換湊仔經，二人直言愛兒打針令他們感肉赤。	仔仔首次打針發燒，令Kelly騰晒雞。 （資料圖片）	Kelly（右三）產後首度作慈善表演。

克勤等天賜仔

同場的克勤大讚Kelly極速收身，指她是天生做藝人材料，他亦認同囝囝打針最令父母肉赤。問他會否再生BB？他說：「要等個天揸主意，（隨時迎接新生命？）睇緣分啦，又想又唔想，過程做媽媽嘅會好辛苦，（想生仔定女？）呢啲要問阿倫，佢好似好有心得。」

文：影視組