甄穎珊十三歲從開平來港後，仍堅持每年回鄉探親，並十分難忘家鄉種種小玩意及美食，更自爆小時候非常百厭，曾扮「蜘蛛俠」在五樓高的外牆上攀爬，她憶述時亦不禁謂：「細個真係唔識死！」
十三歲由開平來港的甄穎珊（Carisa），對家鄉的記憶依然深刻，更堅持每年回鄉省親，早前Carisa便回鄉祭祖：「因為公公同嫲嫲年紀已經好大，好想返去見下啲老人家，佢哋見到我就會好開心，因為做咗藝人之後，工作真係好忙，有時返唔到咁密，但係盡量每年都返去祭祖，順便見下啲親戚，每次食飯都二、三十人一齊出去，真係好熱鬧㗎！」
遺憾劬勞未報
別以為瘦削的Carisa弱不禁風，其實每次祭祖，她都不辭勞苦親自為祖先的墓地清除雜草，她說：「最主要就係拜婆婆，佢最錫就係我，有時諗起佢都會忍唔住喊，因為婆婆走嘅時候，我只係得十歲，根本未有能力同金錢照顧佢，唔可以報答到佢係我嘅遺憾。」
Carisa又帶弟弟回到小時候住的地方，她坦言重遊舊地感覺很特別：「因為我喺嗰間屋出世，所有嘢都帶畀我好多回憶，我最鍾意就係個露台，後來我哋去晒香港，爸爸就買咗另一間屋畀嫲嫲，呢度先空置咗，細佬出世嗰陣已經喺新屋，所以今次都要拉佢嚟睇下。」
雖然兒時好友各散東西，但Carisa重踏當日上學要經過的鄉間小路，那短短的十五分鐘路程，集結了她與同學仔的種種回憶：「其實開平都有分城市同農村，我就住喺城市啲嗰邊，細個着住對膠涼鞋，行過農村嗰邊啲田就會跳落去玩水。」
玩命嚇壞姨媽
Carisa小時候「唔識死」，最難忘就是「蜘蛛俠」事件，她說：「試過喺姨媽屋企，由個窗花爬咗出去，嗰度係五樓，都唔知點解會咁大膽，姨媽返嚟見到嚇到死，又唔敢鬧我，咪好似氹貓仔咁氹我返入屋囉，依家諗番都覺得自己好大膽。」
文：音樂組