黎明、任達華、曹永廉、楊秀惠等昨日齊出席《.9.9.9「無毒一生」支持日》啟動禮，宣揚青少年遠離毒品的訊息，台下有學生問黎明對於校園驗毒計劃會否影響到校內好學生？黎明開始「發功」說：「我相信好學生會被曳學生影響；同樣曳學生都會被好學生影響，令佢哋愈來愈好，相信可以將所有學生都變好。」

(左)：林海峰、(右)：葛民輝	楊秀惠落力宣揚青少年遠離毒品的訊息。	任達華永遠對毒品say no！

「K仔用嚟麻醉大笨象」

在台上黎明更當起「黎Sir」，解釋K仔（氯胺酮）只是一種強烈麻醉藥：「年輕人唔好諗住可以控制藥物，K仔係用嚟麻醉大笨象，唔係人食嘅，試諗吓人食狗糧會點？」果然發人深省！

他又說有家庭問題的青少年不應把所有責任推到家人身上，更以自身經歷為例：「我自己都係破碎家庭成長，去英國讀書時有同學畀支大麻我試，我冇試到，爸爸畀錢我係過去讀書，我心諗將來賺到錢先自己買，大個先知咁樣諗都係唔啱嘅！」活動完畢黎明即匆匆離去，未知是否不欲回應與樂基兒瞞婚一事，避開不接受訪問。

Jan借「虛偽論」搞gag

另外，林海峰（Jan）出席另一活動時被問到是否邀得黎明作talk show嘉賓？Jan即拿對方的「虛偽論」來開玩笑：「佢未覆，我已經第二次邀請佢，下次就係第三次，第三次就冇乜誠意同變得虛偽，唔會有第四次。」　　　　　 文：影視組