四大天王紛紛覓得另一半，唯獨郭富城仍未脫離單身貴族之列，身邊除了有緋聞女友熊黛林（Lynn），早前更被發現偷會王秀琳（Mango），「偷杧」事件令城城和Lynn糾纏三年的關係急劇起了變化。
無顧忌公開睇女
據知，自從Lynn去年接拍《葉問》，令她由Model搖身一變成「過億票房女主角」，身價雖然大躍進，但始終得不到緋聞男友公開其身分，失望之餘再加上疑似第三者出現，促使Lynn舊事重提，逼城城公開名分，令到這段地下情迅即凍過水。
前晚城城與世界小姐張梓琳、台灣性感演員楊謹華、名模戴小奕及劉丹等出席「FASHION MOMENT」2009秋冬時裝及攝影匯展，心情大靚的他毫無顧忌地睇靚女，更風騷地指高妹張梓琳和性感楊謹華各有美態，兼乘機表明未找到心中女神，他說：「張梓琳同楊謹華兩個都靚，男仔比較貪心，最好集合所有優點，好似仙女下凡冇瑕疵，（你搵到自己嘅仙女未？）搵緊，慢慢。」
以後唔講私人嘢
而被問到熊黛林是否其心目中的女神時，他即問非所答︰「我想同大家分享吓心態，最近見到某啲報道風氣上唔係幾好，藝人要唔要將私人嘢話畀大家知？要唔要公開？藝人同傳媒唇齒相依，娛樂應該帶多啲歡樂畀大家，私人嘢唔講係有原因，有時都想禮貌地同大家分享，但今日講出嚟正面，經過轉載又變成負面，所以唔講好過講，希望大家畀啲空間我哋，私人嘢以後都唔會講，冇必要公開，如果有一日郭富城結婚都係喜事，搵到另一半去組織家庭一定會公開。」
頭耷試鞋冇心機
另外，失去「天王嫂」地位的Lynn，日前被發現於友人陪同下到中環行街，全程沒精打采，戴上黑超的她不時頭耷耷，試鞋時明顯沒有心機，結果全無收穫，其後記者上前拍照，一向任影唔嬲的Lynn，心情明顯欠佳，罕有地擰歪面避鏡頭，然後急急腳與友人離開。
楊謹華對於城城點名留意她，笑言很感謝，並大讚城城在娛圈的地位無人能代替。談到跟城城之交情，她表示只是點頭之交，並不熟落，但從去年開始沒有錯過城城任何一場演唱會。
文：影視組